早兩日先同小橋講開，如果架車冇咗電腦，10 個司機有 9 個 9 響雪地根本控制唔到架車！電腦響背後暗地裏做咗太多！
同樣道理，相機呢？自動對焦、自動快門光圈、自動white balance、仲有一系列 post processing，如果呢啲全部冇哂，唔知仲有幾多個「攝影大師」呢？我一直冇買到數碼 SLR，除咗冇錢呢個主因之外，就係因為唔想再做「攝影師」，我當然唔會否定電腦嘅作用，而事實上電腦的確幫我哋做咗唔少「正確」嘅選擇，所以我哋先至好容易咁影到靚相，甚至記者們亦可以無後顧之憂地拍下佢哋可以攞奬嘅大作，電腦確實係居功不少。
不過，打個比方，如果用電腦桌面印刷執咗一幅靚字畫出嚟，可唔可以叫書畫大師？響電腦桌面印刷可以做到美輪美奐嘅今日，係唔係書法就變成一項無意義嘅事情呢？恕我斷章取義：藝術嘅重點在於過程，output 只係副產品嚟啫！同踢波一樣，入波雖然令人興奮，但係入波嘅零點一秒，係要由一個一個美妙組織換嚟，而呢樣先至係球賽嘅精粹！
大家都好雀躍地討論邊部相機好，邊支鏡頭正，IF-ED又靜又銳利，紅圈小小白又輕又快，一時之間個個都做咗攝影專家！難怪我成日同小橋講，男人個個都係音響高手、個個都係攝影大師、個個都係電腦專家，如果你唔識其中一樣，甚或畀人覺得你喳啲，你就好似失去咗男人嘅專嚴咁！就係呢種心態，就令雄性動物發展出一種人類專有嘅技能 ── 吹水！
其實呢個世界邊有咁多專家吖！識少少扮代表嘅人多到數唔哂，我響公司賣音響零件咁多年，都聽過唔少人沾沾自喜地發表佢哋嘅謬論。音響唔講，影相呢家嘢易學難精，一個真正嘅攝影大師係無辦法用語言去講佢點解可以影到啲靚相出嚟，正如一個書法大師都無可能口啽啽就教到你寫得一手好字一樣！影相，同寫書法一樣，係一連串嘅反射動作，響現場環境隨機應變，發揮器材嘅潛能，而呢一連串嘅反射動作，係由心出發，所以每個人影嘅相、寫嘅字，都有佢一套獨特嘅個性！
你估寫大字咁易咩，不過今時今日影相已經變得好簡單，如果寫大字有防手震功能你話幾好呢？影相變得簡單，純粹係電腦已經幫你暗渡陳倉，各位「攝影大師」又何需理會拍攝背後嘅種種理論？只要能夠講出一大堆「光圈」呀、「景深」呀、「TTL」呀、「HDR」呀等等嘅攝影術語，幾位雄性動物就自自然然各不相讓地自我陶醉一番，自己成為大師之路又趨近一點矣。
但係光圈真係淨係影響景深咁簡單？有冇人買鏡頭嗰陣會睇吓支鏡嘅MTF test？其實我都唔會，我買鏡都係睇銀根同埋實際需要，MTF只作參考，不過好多人連 MTF 都唔理就話支鏡幾 sharp 幾利，sharp? 幾時 sharp 呢？f8 sharp？高 contrast sharp？更加有啲大師遇上 Rolling shutter distortion 甚至閃燈快門唔 sync 就驚到以為相機壞咗甚至以為撞鬼！我又真係想問吓呢班大師佢哋咁 Pro、咁有經驗，點解會唔知呢啲嘢？
相機、鏡頭嘅性能各位大師真係掌握好哂？不過 forum 上面經常見到嘅係 ── 景深淺到 cover 唔哂主體啦、無故 over 或者 under 一級半級啦、亂用 super wide angle 搞到畫面亂七八糟啦，亂用大光圈導致出現彗星像差啦，最神奇嘅係世界各地真正嘅攝影大師們推崇至備嘅標準鏡頭，竟然身邊無一位「攝影大師」常備一支旁身！
其實要享受攝影嘅樂趣，不妨放慢腳步，放鬆心情，將相機校去 M mode，對焦校去 MF (數碼化嘅今日，唔驚嘥菲林喎！)，慢慢感受相機嘅操作過程，將相機操作內化成為身體嘅反射動作，人機合一，咁成師為大師之路就不遠矣！DSLR 出咗咁多年，我一直無諗過買，係因為我已經唔再懂得享受攝影嘅樂趣，所以我唔係「攝影大師」，我只不過係一個拎住部傻瓜機見嘢就影嘅 snap 友，一啲都唔 pro，一啲都唔型！