都係講嗰句，本來無一物，何處惹塵埃？
本來想講吓青年充權嘅嘢，但係太理論化，不如講啲易明啲……
陰謀論啲去睇，政府重提網絡 23 條，好大程度係因為 100 毛同埋其「姊妹公司」毛記電視 (以下統稱 100 毛集團) 嘅冒起，100 毛集團係香港近年成功打出 Digital Media 同埋出色地掌控網路力量嘅表表者，呢股力量係人都知到好龐大，亦都個個都想去分一杯羹，所以不論政府、各大商家都企圖利用社交網絡、電子媒界嘅力量創出新天地。
事情唔單只係咁，100 毛集團嘅角色當然就完完全全企響年輕人嘅一方，對一啲反智嘅社會現象、對弱不禁風嘅政府以冷嘲熱諷嘅方式大力鞭撻，結果響短短兩年間，100 毛集團成為了社會上嘅新勢力集團，代表著一眾年輕人，亦同時反映住年輕人對上一輩埋下嘅枷鎖產生嘅種種不滿，再簡單啲講就係藉著結集咗年輕人嘅一大團怨氣，令一眾年輕人由「因一班老屎窟想當然嘅主觀願望而被設定是這樣」而遭埋沒，至躍身成為社會上嘅新力量。(唔好意思，寫得複雜咗少少，但係呢個就係「充權」嘅意義) 而一班老屎窟同埋諸位「社會賢達」對呢種怨氣則只拋下冷冷嘅一句「後生仔，唔好淨係掛住不勞而獲，要肯捱先得架！」然後就將社會上種種荒唐事推卸得一乾二淨，仿佛所有社會問題都係嚟自年輕人咁樣！
100 毛集團創意非凡，亦同時引用咗大量二次創作嚟引起網民嘅共鳴，連填詞泰斗夕爺都話「歌詞愈改得少就愈好笑」，但係竟然會有左膠大大聲聲話如果真係有創意就自己寫歌啦！呢種對二次創作全無認知嘅低智評論，真係令人冒火三丈！問題嘅核心係：咁脆弱嘅香港政府，又點會抵受得住 100 毛集團嘅大力鞭撻呢！尤其是係極度方丈嘅 689，更加視 100 毛集團為眼中釘，而要剷除 100 毛集團，又有咩嘢好得過通過網絡 23 條呢？
脷申：圖片來自唔知邊套畀人二次創作咗幾十次希特拉做主角嘅戲，caption 來自醒覺配音組